Uill Smit Dubay osmonida "parvoz qildi" (video)

Ajoyib aktyor Uill Smit Facebook'dagi sahifasiga "Burj-al-Arab" fonida dengizda tabassum qilib turgan yangi suratini joyladi. Shuningdek u o‘zining dovyurakligini namoyish etib, parashyutdan sakragan videosini ham taqdim etdi. Parashyutdan sakragan aktyor Dubay osmonida "boks raqsi"ni namoyish qilishga ham ulgurdi. 

Gulf News'da ma'lum qilinishicha, Smit Dubayga kelishidan avval Marokash, Qohira va Jiza shaharlarida bo‘lgan. Aktyor oilasi bilan sayohat qilmoqdami yoki yolg‘iz, noma'lum. Uning turmush o‘rtog‘i Jada Pinkett-Smitt va farzandlari Jyeyden, Uillou va Trey Smit so‘nggi yillarda BAAda bo‘lishgan edi. 

O‘tgan yilning avgust oyida Smit Dubayga "Xudkushlar otryadi" ("Suicide Squad") filmi premerasi bilan tashrif buyurgandi. U matbuot anjumanida turmush, tanqid va siyosat haqida so‘zlab, Yaqin Sharqqa kelganida ijobiy fikrlashni targ‘ib qilish istagi haqida aytgandi. 

"Amerikadagi islomofobiyaga keladigan bo‘lsak, men uchun o‘zimni namoyon qilish muhim. Bu xuddi men Dubaydagi kabi... men tvit yozyapman, suratlarimni namoyish qilyapman va hech kim menga nafrat bilan qaramayapti, shunday emasmi? O‘ylashimcha, bu obraz men uchun juda muhim", - degan aktyor.