Elektron ommaviy murojaatlar Parlament va Xalq deputatlari kengashi sessiyalarida ko‘rib chiqiladi

Elektron ommaviy murojaatlar (petitsiyalar) yetarlicha fuqarolar tomonidan qo‘llab-quvvatlangan taqdirda Parlament va Xalq deputatlari kengashi sessiyalarida muhokamaga qo‘yiladi. Bu haqida Oliy Majlis Qonunchilik Palatasi deputati J.J.Shirinov "Taraqqiyot strategiyasi" markazida bo‘lib o‘tgan brifingda ma'lum qildi. Tadbirda qatnashgan KUN.UZ muxbirining xabar berishicha, J.J.Shirinov 2018 yilgi Davlat dasturi doirasida amalga oshirilishi kutilayotgan quyidagi ustuvor yo‘nalishlarni sanab o‘tgan:

1. Davlat organlarida jamoatchilik kengashini tashkil etish. Zero jamoatchilik kengashlari davlat organlarini xalqqa yaqinlashtirish, uning faoliyati ochiqligini ta'minlash uchun xizmat qiladi;

2. O‘zbekiston Respublikasi Prezidenti huzurida Fuqarolik jamiyatini rivojlantirish bo‘yicha Maslahat kengashini tashkil qilish;

3. Parlamentda qonun loyihalarining jamoatchilik muhokamasini tizimli tashkil etish. Bunga jamoatchilikni keng jalb qilish, fuqarolarning parlament qonun muhokamalariga erkin, hech qanday moneliksiz kirishini ta'minlash;

4. "Mening fikrim" maxsus veb-portalini tashkil etish. Bu borada fuqarolardan ko‘p takliflar kelib tushgan. "Mening fikrim" maxsus veb-portali - parlament palatalari, mahalliy xalq deputatlari kengashlariga bevosita fuqarolar tomonidan o‘zining nutqai nazari va tashabbusini bildiradigan maydon. Bunda xalqning o‘zi qonun ijodkorligini ko‘rsatib boradi;

5. Elektron jamoaviy murojaat (petitsiya). Oliy Majlis palatalari yoki xalq deputatlari kengashlariga muayyan tashabbus olib chiqiladi. Tashabbusni yetarlicha fuqarolar qo‘llab-quvvatlasa, albatta, uning muhokamasi qonun bilan belgilanadi. Shundan so‘ng parlament ham, xalq deputatlari kengashi ham o‘z sessiyalarida uni ko‘rib chiqishga majbur bo‘ladi;

6. Nodavlat jamoatchilik tashkilotlarini davlat tomonidan qo‘llab-quvvatlash. Davlat mulkini imtiyozga berish tartibi ishlab chiqiladi;

7. Nodavlat ommaviy axborot vositalarini qo‘llab-quvvatlash. Bugungi kunda nodavlat OAVni davlat tomonidan qo‘llab-quvvatlash Oliy Majlis hisobidagi jamoat fondi tomonidan grant shaklida, ijtimoiy buyurtma va subsidiyalar shaklida amalga oshirib kelinmoqda, lekin endi alohida davlat fondining tashkil etilishi taklifi berilmoqda;

8. Fuqarolar yig‘ini maslahatchilari sayloviga bag‘ishlangan qonunchilikni takomillashtirish. Saylovlarda fuqarolarning bevosita o‘zining ishtirokini ta'minlashga doir takliflar kelib tushmoqda, nomzodlarni ko‘rsatishda shaffoflikni ta'minlash.