ShHT uchun terrorizm va ekstremizm tahdidi qayerdan kelayotgani aytildi

Shanxay hamkorlik tashkiloti (ShHT) davlatlari uchun terrorizm va ekstremizm xavfi birinchi navbatda Afg‘onistondan kelmoqda, biroq vaziyatga yechim topish bo‘yicha bir tomonlama harakatlar uni yanada chuqurlashtiradi. Bu haqda Rossiya Xavfsizlik kengashi kotibi Nikolay Patrushev ShHT davlatlari Xavfsizlik kengashlari kotiblarining seshanba kungi uchrashuvida ma'lum qildi.

"ShHTga a'zo davlatlar uchun terrorizm va ekstremizm xavfi birinchi navbatda Afg‘oniston hududidan kelmoqda. Ishonchimiz komilki, Islom respublikasidagi vaziyatni kuch usullari bilan, xalqaro huquq normalari hamda prinsiplarini chetlab o‘tgan holda, bir tomonlama hal qilishga yo‘naltirilgan istalgan sa'y-harakatlar xavfsizlik uchun qo‘shimcha xatarlar uyg‘otadi", - dedi Patrushev.

Uning so‘zlariga ko‘ra, mamlakati ShHTga a'zo boshqa davlatlar bilan Afg‘onistonda tinchlik va barqarorlikni afg‘onlarning o‘zi boshchiligida siyosiy yechim topish yo‘li bilan tiklash tarafdoridir.

"26-27 mart kunlari Toshkentda bo‘lib o‘tgan Afg‘oniston bo‘yicha anjuman ko‘p tomonlama o‘zaro harakatlarni kuchaytirish lozimligini tasdiqladi, jumladan ShHT doirasida ham. Ushbu uchrashuvni, shuningdek, Kobul jarayoni doirasidagi yig‘ilishni Moskva shakli va “ShHT - Afg‘oniston” guruhi doiralaridagi maslahatlashuvlarning mantiqiy davomi, deb hisoblaymiz", - deya qo‘shimcha qilib o‘tgan Patrushev.

Uning aniqlik kiritishicha, afg‘on masalasi bo‘yicha istalgan tashabbuslar mintaqa davlatlari manfaatlarini hisobga olishi va ularga ma'lum bir ssenariylarni yuklab qo‘yish ehtimolini yo‘qqa chiqarishi lozim. "Shu sababdan Xitoy tomonining aloqa guruhining ikkinchi yig‘ilishini Pekinda o‘tkazish bo‘yicha taklifini qo‘llab-quvvatlaymiz", - deya xulosa qildi Patrushev.