Barcha iste'molchilarning sovuq va issiq suv schyotchiklari xatlovdan o‘tkaziladi

Vazirlar Mahkamasining “Suv ta'minoti va kanalizatsiya xizmatlari uchun tartibga solinadigan narxlarni (tariflarni) shakllantirish, deklaratsiya qilish (tasdiqlash) va belgilash tartibini takomillashtirish chora-tadbirlari to‘g‘risida”gi qarori qabul qilindi.

Hujjat bilan suv ta'minoti va kanalizatsiya xizmatlari uchun tartibga solinadigan narxlarni (tariflarni) shakllantirish, deklaratsiya qilish (tasdiqlash) va belgilash tartibi to‘g‘risidagi nizom tasdiqlandi.

Belgilab qo‘yilishicha, suv ta'minoti va kanalizatsiya xizmatlari uchun tariflarni shakllantirish va belgilashda iste'molchilar uchun ko‘rsatiladigan xizmatlar tannarxini to‘liq qoplash nazarda tutiladi, shuningdek, suv ta'minoti va kanalizatsiya tashkilotlarini rivojlantirish hamda modernizatsiya qilish xarajatlari hisobga olinadi.

O‘zbekiston Respublikasi Uy-joy kommunal xizmat ko‘rsatish vazirligi:

2019 yil 1 iyulgacha bo‘lgan muddatda barcha guruhdagi iste'molchilarning sovuq va issiq suv priborlari bilan jihozlanishi hamda ushbu priborlarning tekshirilish holatini xatlovdan o‘tkazadi;

2019 yil 1 avgustgacha bo‘lgan muddatda “O‘zstandart” agentligi bilan birgalikda yakka tartibdagi va ko‘p kvartirali uy-joy fondida sovuq hamda issiq suv priborlarining o‘rnatilishini moliyalashtirish manbalari va to‘liq yakunlashning aniq muddatlari nazarda tutilgan Sovuq va issiq suvni hisobga olish priborlarini o‘rnatish dasturini ishlab chiqadi hamda O‘zbekiston Respublikasi Vazirlar Mahkamasiga kiritadi.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari 2019 yil 1 iyulgacha bo‘lgan muddatda aholining ichimlik suvni iste'mol qilish normativlarini qayta ko‘rib chiqadi hamda tasdiqlaydi.

Nizomga muvofiq, suv ta'minoti va kanalizatsiya tashkilotlari uy-joy kommunal xizmat ko‘rsatish organlari bilan suv ta'minoti va kanalizatsiya xizmatlari tariflarini qayta ko‘rib chiqish va tasdiqlash uchun Moliya vazirligiga (moliya organlari) murojaat qiladi.

Tariflar Moliya vazirligi tomonidan tegishli organlar taqdim qilgan ma'lumotlar asosida deklaratsiya qilinadi (tasdiqlanadi).

Tariflarni tasdiqlash to‘g‘risidagi qaror u kuchga kirishidan 15 kun oldin e'lon qilinishi lozim.