«Rosselxoznadzor» O‘zbekistonda ishlab chiqarilgan tayyor go‘sht va sut mahsulotlari eksporti uchun qo‘yilgan vaqtinchalik taqiqni bekor qildi

O‘zbekistonda ishlab chiqilgan chorvachilik mahsulotlari, xususan, termik ishlovdan o‘tgan tayyor go‘sht va sut mahsulotlari hamda xomashyolarining Rossiyaga eksporti uchun yo‘l ochildi.

Veterinariya va chorvachilikni rivojlantirish davlat qo‘mitasining Kun.uz’ga xabar berishicha, “Rosselxoznadzor” federal xizmati tomonidan qo‘yilgan vaqtinchalik cheklov Xalqaro epizootik byuroning Quruqlikdagi hayvonlar sog‘lig‘i kodeksi talablari asosida termik ishlovdan o‘tgan tayyor mahsulotlar uchun bekor qilindi.

Endilikda O‘zbekistonda tayyor go‘sht va sut mahsulotlarini ishlab chiqaruvchi tadbirkorlik sub'yektlari o‘z mahsulotlarini Rossiya bozorida sotishi mumkin.

Buning uchun tadbirkorlik sub'yektlari Yevroosiyo iqtisodiy ittifoqiga a'zo davlatlarga eksport qiluvchi korxonalarni yagona reyestriga kirishi zarur bo‘ladi. Reyestrga kiritishdan oldin a'zo davlatlarning vakolatli organlari tomonidan hamkorlikda ishlab chiqaruvchi korxonalarda belgilangan tartibda veterinariya audit va inspeksiya o‘rganishlari o‘tkazilishi zarur bo‘ladi, deyiladi ma'lumotda.

Dastlabki bosqichda, mamlakatda faoliyat olib borayotgan hamda o‘z mahsulotlarini eksport qilish istagini bildirgan go‘sht, sut mahsulotlari, baliq, parranda mahsulotlarini ishlab chiqaruvchi 9ta korxonada mahsulotlarni Yevroosiyo iqtisodiy ittifoqiga a'zo mamlakatlarga eksport qilishni amalga oshirish maqsadida vakolatli organlar tomonidan veterinariya audit va inspeksiya o‘rganishlarining o‘tkazilishi tashkil etildi.

Shu bilan bir qatorda, Veterinariya va chorvachilikni rivojlantirish davlat qo‘mitasi va “Rosselxoznadzor” o‘rtasida O‘zbekistondan eksport qilinadigan chorvachilik mahsulotlari va korxonalar ro‘yxatini yanada kengaytirish borasida o‘zaro hamkorlikdagi ishlar davom etmoqda, deya yakunlangan xabar.