Bolani parvarishlash ta’tilining ish stajiga qo‘shiladigan davri oshirildi

Davlat rahbari «Fuqarolar va tadbirkorlik sub’yektlari huquqlari kafolatlari yanada kuchaytirilishi munosabati bilan ayrim qonun hujjatlariga o‘zgartish va qo‘shimchalar kiritish to‘g‘risida»gi qonunni imzoladi.

Yuqoridagi qonunning 2-moddasiga muvofiq, O‘zbekiston Mehnat kodeksining 234-moddasi beshinchi qismidagi «uch yil» degan so‘zlar «olti yil» degan so‘zlar bilan almashtirildi.

Ushbu moddada aytilishicha, bolani parvarishlash ta’tilida bo‘lgan davrda ayol o‘z ish joyini (lavozimini) saqlab qoladi. Ushbu ta’tillar ish stajiga, shu jumladan mutaxassislik bo‘yicha ish stajiga qo‘shiladi. Avvalgi tahrirda jami uch yildan ortiq bo‘lmagan muddat hisobga olingan, endi esa olti yildan ortiq bo‘lmaydi.

«Fuqarolar va tadbirkorlik sub’yektlari huquqlarining kafolatlari yanada mustahkamlanishi munosabati bilan ayrim qonun hujjatlariga o‘zgartish va qo‘shimchalar kiritish to‘g‘risida»gi qonunning 2-moddasi «Mehnat kodeksini tasdiqlash to‘g‘risida»gi qonun bilan tasdiqlangan yangi Mehnat kodeksi kuchga kirgunga qadar o‘z kuchini saqlab qolishiga e’tibor qaratish lozim.