Chiroqchi tumani sudyasi pora bilan ushlandi

Unga qarshi jinoyat ishi ochildi va sudyalik vakolati to‘xtatildi.

Qashqadaryo viloyati, Chiroqchi tumani sudyasiga jinoyat ishi ochildi. Bu haqda Sudyalar oliy kengashi xabar berdi.

Qayd qilinishicha, Sudyalar oliy kengashi yig‘ilishida Bosh prokurorning fuqarolik ishlari bo‘yicha Chiroqchi tumanlararo sudi sudyasi A.B.ni Jinoyat kodeksining 210-moddasi (Pora olish) tegishli qismi bilan jinoiy javobgarlikka tortishga oid taqdimnomasi muhokama etilgan. Yakunda Kengash xulosasi bilan A.B.ni jinoiy javobgarlikka tortishga rozilik berilgan va uning sudyalik vakolati to‘xtatilgan.

Tergov siri va aybsizlik prezumpsiyasi talablaridan kelib chiqib, xabarda boshqa tafsilotlar oshkor qilinmagan.

Kun.uz manbasi bergan ma’lumotga ko‘ra, sudya 200 dollar miqdorida pora olganlikda gumonlanmoqda.

#pora #Chiroqchi #sudya