Kim Chen In Shimoliy Koreyada ilk kompyuter o‘yinlari klubini ochib berdi

Shimoliy Koreyadagi ilk kompyuter o‘yinlari klubi poytaxt Pxenyan shimolida joylashgan bo‘lib, u o‘z bag‘riga 300 kishini sig‘dira oladi. O‘yin zallarida qanday kompyuterlardan foydalanilishi hozircha noma’lum. Mamlakat rahbari Kim Chen Inning klubga tashrifi vaqtida olingan suratlarda ham o‘yin zallarida birorta kompyuter ko‘rinmagan.

“Bu poytaxt aholisi va butun mamlakat bo‘ylab odamlarning moddiy va madaniy farovonligini tubdan yaxshilash uchun yangi xizmat ko‘rsatish sohalarini barqaror o‘rganish va kengaytirishga qaratilgan qadamdir”, — deya ta’kidlagan KXDR rahbari Kim Chen In klubga tashrifi chog‘ida.

Mutaxassislar mamlakat hukumati klubdagi o‘yinlar kataloglarini jiddiy nazorat qilishini qayd etmoqda. Ta’kidlanishicha, o‘yinlardagi davlat siyosatiga zid o‘rinlar olib tashlanadi.

NK News nashriga ko‘ra, Shimoliy Koreya hukumati bunday klublar orqali yoshlarga ta’sir o‘tkazib, o‘z g‘oyalarini o‘yinlar vositasida targ‘ib qilishi mumkin. Shuningdek, hukumat kompyuter klublaridan kelajakda haker, harbiy dasturchi kabi kasblarni egallashi mumkin bo‘lgan iste’dodli yoshlarni aniqlash joyi sifatida ham foydalanishi ehtimoli bor.