Zargarlik buyumlarini ishlab chiqaruvchilar yanada qo‘llab-quvvatlanadi

Soliq kodeksiga kiritilgan o‘zgartirishga ko‘ra, 2024 yil 1 sentabrdan 2027 yil 1 sentabrgacha «Hunarmand» uyushmasining a’zolari uchun belgilangan soliq imtiyozlarining zargarlik buyumlarini ishlab chiqarish bilan shug‘ullanadigan va «O‘zbekzargarsanoati» uyushmasining a’zolari bo‘lgan yakka tadbirkorlarga nisbatan ham tatbiq etilishi belgilandi.

Shuningdek, mazkur yakka tadbirkorlar ishlab chiqarishda foydalaniladigan ko‘chmas mulk obektlari hamda yer uchastkalari mol-mulk solig‘i va yer solig‘idan ozod etiladi.

«Qimmatbaho metallar va qimmatbaho toshlar to‘g‘risida»gi qonunga kiritilgan qo‘shimchaga ko‘ra, affinaj korxonalari qo‘shimcha ruxsat berish tartib-taomillaridan o‘tmay quyidagi huquqlarga ham ega bo‘lishi ko‘zda tutildi:

- zargarlik buyumlarini ishlab chiqaruvchilarga qimmatbaho metallarni qulay shakllar va hajmlarga keltirgan holda realizatsiya qilish;

- qimmatbaho metallardan suvenir tangalarni ishlab chiqarish va realizatsiya qilish.

Bundan tashqari, zargarlik buyumlarini ishlab chiqaruvchilar o‘zlari qimmatbaho metallardan yasagan zargarlik buyumlarining yarim tayyor mahsulotlarini boshqa zargarlik buyumlarini ishlab chiqaruvchilarga realizatsiya qilish huquqiga egaligi belgilandi.

Bunda yarimtayyor mahsulotlarni realizatsiya qilish qiymati zargarlik buyumlarini ishlab chiqaruvchilar tomonidan London qimmatbaho metallar bozori uyushmasining ertalabki fiksingi bahosidan va Markaziy bankning hisob-kitob amalga oshirilayotgan kundagi kursidan kam bo‘lmagan miqdorda mustaqil ravishda belgilanishi ko‘rsatib o‘tildi.