Germaniya Isroilga qurol eksportini qisman to‘xtatdi

Isroil bosh vaziri Binyamin Netanyahu Falastinning HAMAS guruhiga qarshi kurash rejasini e’lon qilgani, u G‘azo shahri ustidan nazoratni o‘z ichiga olishi ma’lum bo‘lganidan bir necha soat o‘tib, Germaniya hukumati Isroilga qurol yetkazib berishni qisman to‘xtatganini e’lon qildi. Germaniya kansleri Fridrix Mers 8 avgust, juma kuni Isroilga qirg‘oq chizig‘ida ishlatilishi mumkin bo‘lgan harbiy texnika eksporti to‘xtatilayotganini bildirdi.

Germaniya G‘azo sektorida qo‘llanishi mumkin bo‘lgan harbiy texnikani Isroilga «keyingi xabarnomagacha» eksport qilishga ruxsat bermaydi», dedi Germaniya kansleri. U, shuningdek, «Isroil armiyasining G‘azo sektorida Isroil vazirlar mahkamasi qaror qilgan yanada qat’iy harbiy harakatlariga» ishora qildi.

Mersning so‘zlariga ko‘ra, Germaniya hukumati G‘azo sektorida tinch aholining azoblanishi davom etayotganidan qattiq xavotirda. U yangi hujumni boshlagani sababli, Isroil hukumati qirg‘oq aholisi ta’minoti uchun yanada katta mas’uliyatni o‘z zimmasiga oladi va gumanitar yordam, jumladan, BMT va boshqa tashkilotlardan yetkazilishini ta’minlashi kerak, dedi u.

Shu kuni ertalab Isroil xavfsizlik mahkamasi Falastinning HAMAS harakatini «mag‘lubiyatga uchratish» va G‘azo shahri ustidan nazorat o‘rnatish rejasini ma’qulladi. Bu qaror Isroil yuqori martabali amaldorlarining tungi uchrashuvidan so‘ng – urushni to‘xtatish bo‘yicha xalqaro chaqiriqlar kuchayib borayotganiga va HAMAS tomonidan garovga olinganlar taqdiridan qo‘rqqan ko‘plab isroilliklarning noroziliklariga qaramay qabul qilindi.