Вэнс Россия ва Украинани тўғридан тўғри музокаралар ўтказишга чақирди

АҚШ вице-президенти Жеймс Дэвид Вэнс Россия ва Украинани урушни тугатиш учун бевосита музокаралар олиб боришга чақирди. «Руслар ва украиналиклар ўзаро гаплаша бошлашлари жуда муҳим», деди у 7 май, чоршанба куни Вашингтонда Мюнхен хавфсизлик конференцияси ташкилотчилари мезбонлик қилган муҳокамада.

Вэнс бу ўт очишни тўхтатиш йўлидаги «кейинги катта қадам» бўлишини айтди. Ҳеч бўлмаганда Россия ва Украина ўртасида тўғридан тўғри алоқа бўлмаса, АҚШнинг муваффақиятли воситачилик қилиши «деярли имконсиз». Ҳозирда Москва ва Киев ўртасидаги қарама-қаршиликлар жуда катта, шунинг учун уларни музокаралар орқали юмшатишга ҳаракат қилиш мумкин. Вэнс Россия томони можарони ҳал қилишдан манфаатдор эмаслигига ишонмаслигини айтди.

Шу билан бирга, АҚШ вице-президенти Россияда урушни тугатиш учун ҳаддан ташқари қаттиқ шартлар мавжудлигини тан олди. «Руслар ҳозирда бир қанча талаблар қўймоқда. Бизнингча, улар жуда кўп талаб қилмоқда», — дейди у.

Мюнхен конференциясининг собиқ раиси Волфганг Ишингер билан бўлиб ўтган муҳокама чоғида Вэнс АҚШ президенти Доналд Трампнинг Украина масаласи бўйича ҳаракатларини ҳимоя қилди. Трамп Украинадаги урушни «тўлиқ танқид қилди», лекин у «стратегик реалист» ва АҚШ Россиянинг позициясини тушунишга ҳаракат қилмоқда. Бу Россиянинг урушни оқлашига рози бўлишни англатмайди, деди Вэнс. Трамп «инсонпарварлик руҳи»га эргашмоқда ва қотилликларга барҳам бермоқчи.