«Трампнинг сабри тугамоқда» – Рубио

АҚШ президенти Доналд Трампнинг «сабри тугамоқда», лекин у ҳали ҳам Украина можароси ҳал этилишидан манфаатдор ва низо якунланиши борасида аниқ қадамларни кўрмоқчи, деди АҚШ давлат котиби Марко Рубио Fox News’га берган интервюсида.

Фото: Brendan Smialowski/AFP via Getty Images

Унинг сўзларига кўра, Россия билан мулоқотлар «ҳеч қандай натижа олиб келмаётганидан» Трампнинг ҳафсаласи пир бўлган.

«Унинг [АҚШ президентининг] сабри тугамоқда ва Россия томони бу урушни тугатиш учун бирор-бир чора кўришини узоқ кутмоқчи эмас», — деди Рубио.

Америка етакчиси июл ўрталарида «Россиядан жуда норози» эканини айтган ва агарда Украинадаги урушни тўхтатиш борасида келишувга эришилмайдиган бўлса, «100 фоизлик» иккиламчи божлар киритиш билан таҳдид қилганди. У бунинг учун 50 кун муҳлат берган. Шу билан бирга, Трамп ҳеч кимнинг тарафида эмаслигини таъкидлаганди.

Россия президентининг матбуот котиби Оқ уйнинг бу иддаосига жавобан, Трампнинг баёноти «анча кескин услубга эга» эканини айтганди. Песковнинг сўзларига кўра, Россия Қўшма Штатлар билан мулоқотни давом эттириш ниятида ҳамда Вашингтон низони ҳал қилиш йўлидаги ҳаракатларини давом эттиришига умид қилмоқда. Кремл Трампнинг божлар ҳақидаги гапини «жуда жиддий» деб атади ва буни таҳлил қилишга ваъда берди.

#АҚШ #Доналд Трамп #Марко Рубио

Доналд Трамп 12 феврал куни Владимир Путин ҳамда Володимир Зеленский билан телефон орқали мулоқот қилди. Америка президенти Россия-Украина урушини якунлаш бўйича музокаралар бошланаётганини эълон қилди.