YeI Shengen chegaralarida muhr qo‘yishni bekor qilishga kelishib oldi

Yevropa Ittifoqi Kengashi va Yevroparlament Yevropa Ittifoqi chegarasida pasport shtamplari o‘rnini bosuvchi avtomatlashtirilgan kirish/chiqish tizimini (Entry/Exit system, EES) bosqichma-bosqich ishga tushirish bo‘yicha dastlabki kelishuvga erishdi. Bu haqda 19 may, dushanba kuni YeI kengashi saytida ma’lum qilindi.

Tizimni joriy etish to‘g‘risidagi qaror 2017 yilda qabul qilingan va uning ishga tushirilishi bir necha bor qoldirildi. Yakuniy muddat 2024 yil edi. Biroq o‘tgan yilning oxirida Yevropa Komissiyasi (YeK) Germaniya, Fransiya va Niderlandiya uni joriy etishga tayyor emasligi sababli EES'ni ishga tushirishni yana keyinga qoldirdi. Keyin YeK tizimni bir martalik emas, balki bosqichma-bosqich ishga tushirish uchun yangi qoidalarni yaratishni talab qildi.

Yangi kelishuv EES'ni bosqichma-bosqich joriy etish uchun olti oy vaqt berishni taklif qiladi. «Ushbu o‘tish davri tugagunga qadar a’zo davlatlar sayohat hujjatlariga qo‘lda muhr qo‘yishda davom etadi», — deyiladi press-relizda. EES xorijga chiqish pasportlaridagi shtamplarni to‘liq almashtirishi haqida avval xabar berilgan edi.

Yevropa Ittifoqi Kengashi va Yevropa Parlamenti o‘rtasidagi kelishuv EES darhol joriy etilishini anglatmaydi. Tizimni bosqichma-bosqich ishga tushirish sanasi Yevropa Komissiyasi tomonidan belgilanishi kerak. Bundan tashqari, 19 may kuni erishilgan kelishuv dastlabki hisoblanadi va u hali Yevropa Ittifoqi Kengashi va Yevropa Parlamenti tomonidan tasdiqlanishi kerak.