Toshkent-Islomobod yo‘nalishida to‘g‘ridan to‘g‘ri aviaparvozlar yo‘lga qo‘yildi

Milliy aviatashuvchining Airbus A320 NEO rusumli samolyoti Islomobod xalqaro aeroportida, xalqaro aviatsiya tartib-taomiliga ko‘ra suvli arka bilan tantanali ravishda kutib olindi.

Rasmiy kutib olish marosimida so‘zga chiqqanlar ta’kidlaganidek, Toshkent-Islomobod o‘rtasida to‘g‘ridan to‘g‘ri aviaparvozlarning yo‘lga qo‘yilishi O‘zbekiston va Pokiston o‘rtasidagi turizm, savdo-iqtisodiy hamkorlik, ta’lim va madaniyat sohalaridagi aloqalarni yangi bosqichga olib chiqishga hamda ikki tomonlama savdo aylanmasi hajmini kelgusida 2 milliard AQSh dollariga yetkazish borasidagi vazifalarni samarali amalga oshirishga xizmat qiladi.

Islomobod xalqaro aeroporti direktori Said Aftab Ali Shah Gilani ta’kidiga ko‘ra, ushbu aviaqatnovlar O‘zbekiston orqali Markaziy Osiyo mamlakatlari va Pokiston o‘rtasida qulay, tezkor va xavfsiz havo yo‘li vujudga kelishiga imkon yaratadi. Bu esa, o‘z navbatida, mintaqaviy barqaror rivojlanish, logistika tarmoqlarini diversifikatsiya qilish va tranzit salohiyatni to‘liq ishga solish uchun muhim asos bo‘ladi.

Uzbekistan Airways Islomobod xalqaro aeroportidan parvozlarni amalga oshirayotgan 28-kompaniyaga aylandi.