Rossiya konserva ishlab chiqaruvchi eng yirik kompaniyani milliylashtirdi

Rossiya avvalroq Universal Beverage Company Amerika kompaniyasiga tegishli bo‘lgan yirik konserva ishlab chiqaruvchi "Glavprodukt"ning aktivlarini milliylashtirdi. Bu haqda 11 iyul, juma kuni Moskva arbitraj sudida ma’lum qilindi.

«Sud Bosh prokuraturaning «Glavprodukt» aktivlari va uning rahbari (Leonid) Smirnovning mulkini davlat foydasiga xatlovga olish to‘g‘risidagi da’vosini to‘liq qondirishga qaror qildi. Qaror darhol kuchga kiradi», — deya qo‘shimcha qilindi sudda.

"Glavprodukt" tarkibiga Moskva shahri, Kaliningrad, Moskva va Oryol viloyatlaridagi 32 ta kompaniya kiradi, ular Rossiya Federatsiyasining ichki bozorini oziq-ovqat mahsulotlari bilan ta’minlaydi, deb ta’kidladi TASS agentligi. 2009 yilda Smirnov kompaniyani Amerikaning Universal Company 2000 va Universal Beverage Company kompaniyalariga qayta ro‘yxatdan o‘tkazdi.

«Vedomosti» gazetasining eslashicha, Leonid Smirnov 1970-yillarda SSSRdan AQShga ketgan va u yerda Amerika fuqaroligini olgan. 1995 yilda u Rossiyaga qaytib keldi va to‘rt yildan so‘ng Ohayo shtatida ro‘yxatdan o‘tgan o‘zining Universal Beverage Company kompaniyasi orqali «Glavprodukt» holdingiga asos soldi.

2007 yilda Rossiya Ichki ishlar vazirligi «Glavprodukt» kompaniyasi rahbarlariga soliq to‘lashdan bo‘yin tovlaganlikda ayblab, jinoiy ish ochgan. Tintuvlardan so‘ng Smirnov Germaniyaga jo‘nab ketdi. Keyinchalik tadbirkor JPMorgan Chase hisoblariga deyarli 1,4 milliard rublni o‘tkazganlikda ayblangan. 2024 yil oktyabr oyida Rossiya prezidenti Vladimir Putinning farmoni bilan bir qator "Glavprodukt" kompaniyalari Federal mulkni boshqarish agentligining vaqtincha boshqaruviga o‘tkazildi.