Россияда карантиндаги ўзбекистонлик муҳожирлар оммавий норозилик билдирди. Уларнинг паспорти олиб қўйилган

Ижтимоий тармоқларда Москва областида бир неча юз нафар ўзбекистонлик муҳожир норозилик билдириб, намойишга чиққани акс этган видеолар тарқалди.

Ушбу фуқаролар – қонуний тарзда, Ташқи меҳнат миграцияси агентлиги томонидан Россияга жўнатилган меҳнат мигрантлари.

Улар уч ойдан буён ётоқхонадан ҳеч қаерга чиқа олишмаётгани, паспортларини олиб қўйишгани, ишламай шунча вақтдан бери ётоқхонага қамалиб қолишгани боис эътироз билдиришган.

Фуқароларга кўра, улар учун белгиланган карантин муддати 6 апрелда тугаши керак бўлган.

20 апрел куни Ташқи меҳнат миграцияси агентлиги «АНТЭК» компаниясига ишга жалб қилинган фуқаролар ҳақида ижтимоий тармоқларда тарқалаётган хабарлар юзасидан баёнот берди.

Ўрганиш жараёнида аниқланишича, фуқароларнинг карантин шароитида бўлиш даври чўзилиб кетган. Роспотребнадзор ўтказган текширишларда айрим фуқароларда коронавирус аниқлангани сабабли, улар 2 ойга яқин вақт давомида карантин ҳудудида бўлиб турибди.

Шунингдек, иш берувчи ташкилотлар ходимлари томонидан ишчиларнинг шахсини тасдиқловчи ҳужжатлари олиб қўйилган. Миграция агентлиги бу фактга муносабат билдирмаган.

Қайд этилишича, карантин ҳудудида бўлиб турган фуқароларда ишлаш ҳуқуқини берувчи патентни расмийлаштириш учун ваколатли органларга мурожаат қилиш муддатининг ўтиб кетаётгани ва расмийлаштирилган патент учун тўловларнинг амалга оширилмаётгани сабабли бекор бўлиши каби хавотирлар пайдо бўлган.

Фуқаролар учун овқат ташкил этиш билан боғлиқ ҳамда ётоқхона хавфсизлиги ходимлари билан ҳам муаммолар юзага келган.

«Айни пайтда ушбу вазият назоратга олинган бўлиб, юқоридаги муаммоларни бартараф этиш, хусусан, паспортларни фуқароларга қайтариш, қурилиш объектларида иш бошлаш жараёнини тезлаштириш, уларнинг яшаш ва ишлаш шароитларини яхшилаш бўйича «АНТЭК» МЧЖ раҳбарияти билан музокаралар олиб борилмоқда», – дейилади агентлик ахборотида.