Тошкентдан Нукусга етиб бориш вақти 16 соатдан 7 соатгача қисқаради

Қорақалпоғистондаги учта туман туризмга ихтисослаштирилади. Тошкентдан Нукусга тезюрар поезд қатнови йўлга қўйилиб, манзилга етиб бориш вақти 16 соатдан 7 соатгача қисқаради. Kun.uz мухбирининг маълум қилишича, бу ҳақда президентликка номзод Шавкат Мирзиёев қорақалпоғистонлик сайловчилар билан учрашувда айтиб ўтган.

"Афросиёб" поезди / Фото: Kun.uz

Президентнинг ўз сайловолди дастурида айтишича, бунинг учун узунлиги 465 километр бўлган “Бухоро-Урганч-Хива” ва узунлиги 196 километр бўлган “Мискин-Нукус” темирйўл линиялари электрлаштирилади. Бу лойиҳага 460 миллион доллар йўналтирилади.

Линия ишга туширилгач, “Тошкент – Самарқанд – Бухоро – Хива” анъанавий туристик занжирига Қорақалпоғистон ҳам қўшилади.

“Натижада, хорижий ва маҳаллий сайёҳларнинг юртимизда 4-5 кунгача бўлишини таъминлаш, туристик хизматлар экспортини 100 миллион долларга етказиш имконияти яратилади”, – деди Мирзиёев.

Номзоднинг сўзларига кўра, Элликқалъа, Қўнғирот ва Мўйноқ туманлари туризмга ихтисослаштирилади. Тўрткўл, Беруний, Амударё, Хўжайли, Қонликўл, Қўнғиротда йўл-савдо инфратузилмаси кенгайтирилади.

#поезд #Қорақалпоғистон #Шавкат Мирзиёев

Ўзбекистонда 2023 йил 9 июл куни муддатидан илгари президенти сайлови бўлиб ўтади. Янгиланган Конституцияга кўра, президент ваколат муддати ҳозирги 5 йилдан 7 йилга оширилган.