General Motors Malibu ишлаб чиқаришни тўхтатади

General Motors жорий йил ноябр ойидан Chevrolet Malibu автомобилларини ишлаб чиқаришни тўхтатади. Компания бу қарорни асосий эътибор электр транспорт воситалари ишлаб чиқарилишига қаратилаётгани билан изоҳлаган.

Фото: Chevrolet

General Motors компанияси жорий йилнинг кузидан бошлаб бензинда ҳаракатланадиган Chevrolet Malibu автомобилларини ишлаб чиқариш тўхтатилишини эълон қилди.

Айни пайтда ушбу автомобил ишлаб чиқарилаётган Fairfax заводи янги авлод Bolt электр хетчбеклари учун ихтисослаштирилади. Бундан ташқари, худди шу завод қисқа танаффусдан кейин Cadillac XT4 кроссоверини йиғишни яна давом эттиради. Bolt’дан фарқли ўлароқ, ХТ4 анъанавий бензинли двигателлар қаторини сақлаб қолади.

Маълумот учун, GM 1964 йилдан бошлаб ушбу русумдаги автомобилларни дастлаб Chevelle, кейин эса Malibu бренди остида ишлаб чиқариб келаётган эди. Ўтган давр мобайнида ушбу моделнинг 10 миллиондан ортиқ сотувига эришилган.

Эслатиб ўтамиз, 2012 йилнинг март ойидан бошлаб Ўзбекистонда ҳам Chevrolet Malibu автомобилини йиғиш бошланганди. Айни пайтда ушбу автомобил UzAuto Motors томонидан 419 млн сўмдан харидорларга таклиф қилинмоқда.

#General Motors #Malibu