Буюк Британия ёлланма гуруҳлар ва Скрипални заҳарлаганларга қарши санкциялар қўллади

Буюк Британия Россияга қарши охирги 1,5 йил ичидаги энг катта санкциялар пакетини эълон қилди. 56 нафар жисмоний ва юридик шахсни қамраб олган янги чоралар Украинага қарши уруш олиб боришда керак бўладиган ускуналарнинг етказиб берилишини тўхтатишга қаратилган.

Қайд этилишича, «қора рўйхат»дан Украина ва Африка давлатларида жанг қилаётган турли қуролли тузилмалар ўрин олган. Улар орасида — футбол ишқибозларидан йиғилган «Эспанола» кўнгилли неонацистлар баталони ва унинг командири Михаил Турканов ҳам бор. «Вагнер» ХҲКнинг Марказий Африка Республикасида фаолият юритаётган ёлланма жангчилари — Евгений Ходотов, Евгений Копот ва Александр Кузин ҳам санкцияларга киритилди.

Бундан ташқари, Буюк Британия Россия Мудофаа вазирлиги томонидан Африкада операциялар ўтказиш учун тузилган «Африка корпуси»га қарши санкциялар қўллаган биринчи давлатга айланди. 2014 йилда Чехия ҳарбий омборларида юз берган портлашларни ташкиллаштиришда гумонланган «ГРУ» генерал-майори Андрей Аверяновга нисбатан ҳам чекловлар қўлланди. Қайд этилишича, у «Вагнер» ва «Африка корпуси» командири сифатида Ливиянинг барқарорлиги ҳамда хавфсизлигига таҳдид қилган ҳолда фаолият юритган.

Шу билан бирга, ўзини мустақил деб эълон қилган Жанубий Осетиянинг собиқ президенти Анатолий Бибилов ҳам «қора рўйхат»га киритилди. Таъкидланишича, у Украинанинг ҳудудий яхлитлигига путур етказиш ва беқарорлаштиришда иштирок этган.

Шунингдек, «ГРУ» собиқ полковниги Сергей Скрипал ва унинг қизи Юлияни заҳарлашга алоқадор Разведка бош бошқармасининг офицери Денис Сергеев санкциялар рўйхатига киритилди. Британия ҳукуматига кўра, у 2018 йил 4 март куни Солсберида «Новичок» кимёвий қуролини қўллашда иштирок этган.

Эслатиб ўтамиз, 2018 йил 4 март куни Сергей Скрипал ва унинг қизи Юлия Скрипал Солсберидаги хиёбонда беҳуш ҳолда топилганди. Кейинроқ маълум бўлишича, улар инсонни фалажлаштирувчи «Новичок» моддаси билан заҳарланган. Британия бу ишда Россияни айблайди. Айбловга кўра, жиноятни аслида ГРУ разведкачилари қилган, лекин Британия ҳудудига Александр Петров (аслида офицер Александр Мишкин) ва Руслан Баширов (аслида полковник Анатолий Чепига) исми билан кирган одамлар содир этган.

Бундан ташқари, Хитой, Туркия ва Марказий Осиё давлатларидаги 28 та фирмага нисбатан ҳам санкциялар қўлланди. Улар Россия ҳарбий-саноат мажмуасига станоклар, микроэлементлар, дронлар учун эҳтиёт қисмлар етказиб беришда айбланган.