Аҳоли ва хўжалик субъектлари бинолари томининг камида 50 фоизи қуёш панеллари билан жиҳозланади

"Казинформ" халқаро ахборот агентлиги маълумотига кўра, мазкур дастур доирасида бинолар томларига қуёш панеллари ўрнатилиб, қўшимча "яшил" қувватларни яратиш бўйича лойиҳалар ишлаб чиқилади. Шунингдек, Ўзбекистонда келгуси икки йилда 3 мингта кичик ГЭС ишга туширилиши режалаштирилгани маълум қилинган.

"Аҳоли ва хўжалик субъектлари биноларининг томларини камида 50 фоиз қуёш панеллари ва гелиоколлекторлар билан қоплаш бўйича кўрсатмалар ва дастур ишлаб чиқариш топширилган", – дея Ўзбекистон энергетика вазири Жўрабек Мирзамаҳмудов фикрларидан иқтибос келтирилган мақолада.

Қайд этилишича, ушбу дастур қайта тикланувчи энергия манбалари улушини ошириш ва анъанавий энергия манбаларига қарамликни камайтиришга кўмаклашади. Шунингдек, ташаббус доирасида энергия самарадорлиги паст бўлган корхоналарни модернизация қилиш бўйича чоралар кўрилади ва электр энергияси, табиий газ ҳамда иссиқликни тежаш бўйича режалар ишлаб чиқилади.

2024 йилда Ўзбекистонда сал кам 11 минг жисмоний шахс мамлакат энергетика тизимига 12 миллион 182 минг 90 киловатт-соат қуёш энергиясини етказиб берди ва давлат бюджетидан 12 миллиард 182 миллион сўм миқдорида субсидия олди.