Қўшимча функционаллар
-
Тунги кўриниш
«Пайшанба куни Туркияда кутаман». Зеленский Путинни шахсан учрашишга таклиф қилди
Россия президенти 15 май куни Истанбулда Украина билан 2022 йилда тўхтаб қолган тўғридан-тўғри музокараларни тиклаш таклифини берди. Зеленский бунга розилик билдирди. Ўз навбатида Доналд Трамп ҳам Украинадан Россия билан музокараларни бошлашни талаб қилди.
Фото: Gazeta.ru
АҚШ президенти Доналд Трамп Украина зудлик билан Россиянинг таклифига рози бўлиши ва 15 майдан Туркияда тўғридан-тўғри музокараларни бошлаши кераклигини маълум қилди.
«Ҳеч бўлмаганда, улар битим тузиш мумкинми ёки йўқ — шуни аниқлаб олишади. Агар мумкин бўлмаса, унда Европа етакчилари ҳамда АҚШ вазият қандайлигини кўради ва тегишли тарзда ҳаракат қилишлари мумкин бўлади!» — деб ёзади Трамп ўзининг Truth Social ижтимоий тармоғига.
«Мен Украина Иккинчи жаҳон урушидаги ғалабани нишонлаш билан жуда банд бўлган Путиннинг таклифига рози бўлишига шубҳа қила бошладим. Бу урушни АҚШсиз ютиб бўлмасди (ҳатто яқин ҳам бора олмасди!)», — деб ёзади АҚШ президенти.
«УЧРАШИНГЛАР, ҲОЗИРНИНГ ЎЗИДА!!!» — дея якунлаган у.
Украина президенти Володимир Зеленский ўз навбатида РФ президенти Владимир Путин билан музокараларда учрашишга тайёрлигини маълум қилди.
«Эртага биз ўт очиш тўлиқ ва узоқ муддатга тўхтатилишини кутяпмиз — бу дипломатия учун зарур асос яратади. Қотилликни чўзишнинг ҳеч қандай маъноси йўқ. Ва мен Путинни пайшанба (15 май) куни Туркияда кутаман. Шахсан,» — деб ёзади Зеленский ўзининг Telegram каналига.
Владимир Путин 11 майга ўтар кечаси Кремлда матбуот анжумани ўтказиб, Украинага «2022 йилда тўхтатиб қўйилган» тўғридан-тўғри музокараларни 15 майдан Истанбулда, дастлабки шартларсиз бошлашни таклиф қилди.
Украина президенти Володимир Зеленский эса Россиянинг тинчлик сулҳига рози бўлишини кутаётгани ва Киев Москва билан музокаралар ўтказиш учун учрашувларга тайёрлигини маълум қилди.
Россия-Украина уруши
