Россия йил охиригача Ҳиндистондан 1 миллион меҳнат мигрантини қабул қилиши мумкин

Россия юқори малакали кадрлар етишмовчилигини қоплаш учун Ҳиндистондан 1 миллион меҳнат мигрантини жалб қилишни режалаштирмоқда. Бу ҳақда Урал Савдо-саноат палатаси раҳбари Андрей Беседин маълум қилди.

«Ҳиндистонлик ҳамкасбларимдан эшитганимдек, йил охиригача Россияга, жумладан, Свердловск вилоятига Ҳиндистондан 1 миллион мутахассис келади. Екатеринбургда ушбу мамлакатнинг янги Бош консуллиги очилмоқда, у ушбу масалалар билан шуғулланади», деб тушунтирди у ЕАН агентлигига берган интервюсида.

Беседин сўзларига кўра, Россия саноат корхоналари ишлаб чиқариш қувватларини ошириши керак, бироқ минтақада ишчи кучининг юқори танқислиги кузатилмоқда. Ходимларнинг бир қисми Украинадаги «махсус операцияга» жалб қилинган, ёшлар эса заводларда ишлашга иштиёқи йўқ, бу эса «мамлакатдаги аввалги мафкуравий хато» билан боғлиқ.

Ҳиндистондан ташқари Шри-Ланка ва Шимолий Корея билан ҳам иш олиб борилмоқда. Бироқ, палата раҳбари таъкидлаганидек, ушбу мамлакатлардан келган меҳнат мигрантлари билан ҳамкорлик қилиш қийин кечиши мумкин.

Янги ишчилар, биринчи навбатда, юқори малакали мутахассислар зарур бўлган металлургия ва машинасозлик саноатига юборилади.