Қўшимча функционаллар
-
Тунги кўриниш
Tesla август ойидан Ҳиндистонда электромобиллар савдосини бошлайди
Tesla’нинг ушбу мамлакатдаги биринчи шоуруми Мумбайда 15 июл куни, иккинчиси — июл охирларида Ню-Деҳлида очилади.
Фото: Getty images
Tesla келаси ҳафта Ҳиндистонда ўзининг биринчи шоурумини очади ва келаси ойдан мижозларга электромобиллар етказиб беришни бошлайди.
Қайд этилишича, Tesla’нинг ушбу мамлакатдаги биринчи шоуруми Мумбайда 15 июл куни, иккинчиси — июл охирларида Ню-Деҳлида очилади. Bloomberg агентлиги манбаларининг сўзларига кўра, шоурумларда потенциал харидорлар электромобилларнинг нархлари ва мавжуд моделлари ҳақида маълумот олиши мумкин.
Орқа узатмали Model Y йўлтанламасларининг биринчи партияси мамлакатга аллақачон Хитойдаги заводдан олиб келинган.
Ҳиндистон — катталиги бўйича дунёда учинчи ўринда турадиган бозор бўлиб, уни эгаллаш Tesla’га бошқа минтақаларда камайган савдони қоплашга ёрдам бериши мумкин. Иккинчи чоракда компания электромобиллар етказиб беришни ўтган йилнинг мос даврига нисбатан 13,5 фоизга (384 мингтача) қисқартирган. Ушбу қулаш компания тарихидаги энг ёмон кўрсаткич ҳисобланади.
Эслатиб ўтамиз, май ойида Европада Tesla электромобиллари савдоси қулаган эди. Бунга компания раҳбари Илон Маскнинг сиёсий фаоллиги асосий сабаблардан бири сифатида кўрсатилган. Tesla’нинг ЕИдаги савдолари ўтган йилга нисбатан 52 фоиздан ортиққа тушиб кетган.
