Sanches: Haqiqiy xarakterga ega jamoada o‘ynashni istayman

«Arsenal» hujumchisi Aleksis Sanches qanday shart evaziga Londonda qolishi mumkinligi haqida gapirdi. Bundan oldinroq ushbu chililik futbolchi moliyaviy masalalarda kelisha olmayotgani tufayli shartnomasini uzaytirmayotgani aytilgandi. Unga endilikda «Manchester Siti», «PSJ», «Yuventus», va «Bavariya» qatorida «Chelsi» klubidan ham qiziqish paydo bo‘lgan.

«Men Londonda o‘zimni juda yaxshi his qilaman va «Arsenal» bilan shartnomamni oxirigacha ishlash niyatidaman. Shu shaharda o‘ynashda davom etib, sovrinlar yutishni istayman. Men o‘z oldiga katta maqsadlar qo‘yadigan jamoada harakat qilmoqchiman. Yoshim 28da va hali hammasi oldinda. Men o‘z organizmim haqida qayg‘urishni hech qachon yoddan chiqarmayman. Umid qilamanki, «Arsenal» bilan ham sovrinlarga ega chiqaman», - deya Aleksisning so‘zlarini keltiradi Metro.

Joriy mavsumda ushbu futbolchi jamoaning barcha turnirlari doirasida 38 uchrashuv o‘tkazib, 22 gol urdi hamda 18 golga uzatma berdi. Transfermarkt.de portali futbolchining transfer qiymatini 65 mln yevroga baholagan. Aleksisning «Arsenal» bilan shartnomasi 2018 yilning yoziga qadar imzolangan.