Braziliyada bolalar bog‘chasiga hujumda 3 bola va 2 tarbiyachi halok bo‘ldi

Folha de S.Paulo nashri ma'lumotlariga ko‘ra, politsiyaga hujum haqida birinchi xabarlar mahalliy vaqt bilan soat 10:30 atrofida tusha boshlagan. Hujumni machete bilan qurollangan 18 yoshli o‘smir sodir etgan. U voqea joyidan qochishga urinish vaqtida mahalliy aholi tomonidan ushlangan. O‘smir qo‘lga olinish vaqtida o‘z joniga qasd qilmoqchi bo‘lgan.

Hujum vaqtida 1,5 yoshdan 3 yoshgacha bolalarga mo‘ljallangan bog‘chada 30ga yaqin tarbiyalanuvchi bo‘lgan. Bog‘cha xodimlarining xatti-harakatlari tufayli ko‘proq qurbonlarga yo‘l qo‘ymaslikka muvaffaq bo‘lingan. Ular bolalar bilan birga xonalarda qulflanib olishgan.

O‘smirning bunday xatti-harakatlarni sodir etishi sabablari noma'lumligicha qolmoqda.

Voqea munosabati bilan shtatda 3 kunlik motam e'lon qilingan.

Avvalroq shunday hujum Xitoyda sodir etilgandi. Guansi-Chjuan muxtor rayonidagi bolalar bog‘chasiga pichoq bilan qurollangan erkak hujum qilishi oqibatida 16 nafar bola va 2 tarbiyachi jarohatlangandi.