Axborot texnologiyasi sohasida yutuqqa erishgan qizlar «Zulfiya» mukofoti bilan taqdirlanadi

Prezidentning 1999 yil 10 iyundagi “Zulfiya nomidagi davlat mukofotini ta’sis etish bo‘yicha takliflarni qo‘llab-quvvatlash to‘g‘risida”gi farmoniga o‘zgartirish va qo‘shimchalar kiritish to‘g‘risida”gi farmoni loyihasi e’lon qilindi.

Farmon loyihasi bilan Zulfiya nomidagi Davlat mukofoti komissiyasi Oila va xotin-qizlar davlat qo‘mitasi huzurida jamoatchilik asosida faoliyat ko‘rsatishi hamda unga bosh vazir o‘rinbosari – Oila va xotin-qizlar davlat qo‘mitasi raisi rahbarlik qilishi belgilab qo‘yilmoqda.

Axborot texnologiyalari yo‘nalishida alohida yutuqlarga erishgan iqtidorli qizlarni ushbu mukofot bilan taqdirlab borish yo‘lga qo‘yilmoqda.

Zulfiya mukofoti talabgorlarni tanlash bo‘yicha ekspert guruhiga beriladigan to‘lovlar va boshqa tashkiliy masalalar bilan bog‘liq sarf-xarajatlar uchun aniq moliyaviy manba belgilanmagani sababli Oila va xotin-qizlar davlat qo‘mitasi huzuridagi “Oila va xotin-qizlar davlat maqsadli jamg‘armasi”ga davlat budjetidan tegishli mablag‘lar ajratilishi to‘g‘risidagi vazifa kiritilmoqda.

Farmon loyihasi bilan uning ijrosini nazorat qilish bosh vazir o‘rinbosari – Oila va xotin-qizlar davlat qo‘mitasi raisi zimmasiga yuklatilmoqda.