Трамп мис импортига 50 фоизлик божлар ҳақида маълум қилди

АҚШ президенти Доналд Трамп савдо можаросини кенгайтирмоқда: у мис импортига 50 фоизлик тарифларни жорий этиш ва тиббий маҳсулотларга божларни ошириш билан таҳдид қилмоқда. Бу ҳақда Трамп 8 июл, сешанба куни Оқ уйда бўлиб ўтган учрашувда маълум қилди.

Натижада, бозорларда мис нархи кескин кўтарилиб, рекорд даражага — бир тонна учун 12 330 долларга етди. Бундан ташқари, Доналд Трамп дори воситаларига 200 фоизлик бож жорий этиш билан таҳдид қилган. Шу билан бирга, у ишлаб чиқарувчиларга «ишларини тартибга солиш» учун бир йил вақт ажратишга ваъда берди.

Мис тарифлари қачон кучга кириши ҳозирча аниқ эмас. Улар пўлат, алюминий ва автомобиллар бўйича мавжуд божларга қўшимча ҳисобланади. Шу билан бирга, Доналд Трамп 7 июл куни ЕИ ва бошқа баъзи мамлакатлардан импортга савдо божларини оширишни кечиктирди: қоидалар 8 июлдан кучга кириши керак эди, бироқ бу муддат 1 августга кўчирилди.

Мис электромобиллар, қуроллар ва электр тармоқлари учун асосий рол ўйнайди. Оқ уйнинг таъкидлашича, ушбу металл импортига божларни ошириш маҳаллий ишлаб чиқаришни рағбатлантириши керак. Йел университетидаги The Budget Lab таҳлилий маркази томонидан ўтказилган тадқиқотга кўра, америкалик истеъмолчилар аллақачон мис импортига жорий қилинган 17,6 фоизлик тарифларнинг салбий оқибатларига дуч келган – бу 1934 йилдан бери энг юқори кўрсаткичдир.