Макрон Ғазода ўт очишни тўхтатишга ва Украинани қўллаб-қувватлашга чақирди

Франция Президенти Эммануэл Макрон Британия парламенти аъзолари олдида қилган чиқишида икки давлат ўртасидаги кўп қиррали алоқалар, шунингдек, Ғазода ўт очишни тўхтатишни таъминлаш ва Россия-Украина уруши бўйича музокаралар ҳақида гапирди.

Макрон Буюк Британияга уч кунлик давлат ташрифининг биринчи кунида Вестминстер саройида парламентарийлар олдида чиқиш қилди.

Франция президенти урушнинг Европа қитъасига қайтиши билан дунё тартиби ҳар куни ҳужумга учраганини ва халқаро қоидалар беқарорлаштирувчи кучлар томонидан бузилаётганини айтди. У иттифоқчиларни халқаро тартибни ҳимоя қилиш учун биргаликда ҳаракат қилишга чақирди.

Макрон Украина ноқонуний ҳужум қурбони бўлганини таъкидлаб, Буюк Британиянинг Иккинчи жаҳон урушида Францияни қўллаб-қувватлаганига ишора қилиб, ҳозирда Украинага ҳам худди шундай ёрдам кўрсатилаётганини таъкидлади.

«Россия Украинадаги ҳар бир олға силжиши билан таҳдид барчамизга яқинлашмоқда», деди у. Макрон Европа ҳеч қачон Украинани ёлғиз қолдирмаслигини таъкидлади.

Макрон ўз нутқида Исроил томонидан шиддатли ҳужум ва блокада остида бўлган Ғазо секторидаги сулҳ музокараларига ҳам тўхталди.

Унинг таъкидлашича, Франция Яқин Шарқда тинчлик учун бошқа давлатлар билан ҳамкорлик қилади.