Rafael Nadal faoliyatidagi 1000-g‘alabani qo‘lga kiritdi

4 noyabrda Nadal Parijda o‘tayotgan “Masters” musobaqasining 2-raundida hamyurti Felisiano Lopes bilan kechgan bahsda uni mag‘lubiyatga uchratdi. Ushbu uchrashuv 34 yoshli Nadal uchun murakkab kechdi. U dastlabki setni raqibiga 6:4 hisobida boy berdi, 2- va 3-setlarni esa 7:5 va 6:4 hisobida o‘z foydasiga hal qildi.

Nadalning ushbu musobaqa bo‘yicha keyingi raqibi avstraliyalik Jordan Tompson bo‘ladi.

Lopes ustidan qozonilgan g‘alaba Nadal uchun faoliyatidagi 1000-g‘alaba bo‘ldi. Ayni vaqtda uch tennischigina Nadaldan ko‘proq g‘alabaga ega: bular – amerikalik sobiq tennischi Jimmi Konnors (1274 ta g‘alaba), hozirda ham faoliyatini davom ettirayotgan Rojyer Federer (1242) va chexoslovakiyalik sobiq tennischi Ivan Lendl (1068).

Rafael Nadal ayni vaqtda dunyoning ikkinchi raqamli tennischisi bo‘lib turibdi. U “Katta dubulg‘a” seriyasiga kiruvchi musobaqalarning 20tasida g‘alaba qozongan. Jumladan, ispaniyalik tennischi 13 marta Fransiya ochiq chempionati, 2 marta Uimbldon, 4 marta AQSh ochiq chempionati va bir marta Avstraliya ochiq chempionati g‘olibi bo‘lgan. U, shuningdek, bir nechta rekordlar sohibi hisoblanadi.