Toshkentda metro bekatlari bo‘ylab avtobuslar qatnovi yo‘lga qo‘yiladi

Toshkentda elektr energiyasi ta’minotida uzilishlar kuzatilayotgani bois 25 yanvar kuni poytaxt metropolitenining ayrim yo‘nalishlari bo‘ylab avtobuslar qatnovi yo‘lga qo‘yiladi. Bu haqda «Toshshahartransxizmat» xabar berdi.

Ma’lum qilinishicha, «Toshshahartransxizmat» tarkibidagi MAN RR3 (sayyohlik) rusumli avtobuslar ajratilgan bo‘lib, ular Buyuk ipak yo‘li va Olmazor yo‘nalishi bo‘yicha metropolitenning barcha stansiyalarida to‘xtab o‘tish asosida yo‘lovchilarga transport xizmatlarini ko‘rsatadi.

25 yanvar kuni soat 11:00 larda O‘zbekistonning qator viloyatlarida elektr energiyasi ta’minoti uzildi. Toshkent metropoliteni faoliyati ham to‘xtagan, Respublikadagi barcha poyezdlar o‘z manzillariga kechikib yetib borishi aytilmoqda.