Европарламент Украина тинч аҳолисини қийноққа солганларни жазолашга чақирди

Европарламент Европа Иттифоқини украиналик маҳбуслар ва қўлга олинганларга нисбатан зўравонлик ва қийноқлар учун жавобгар бўлган россиялик амалдорларга қарши шахсий санкциялар қўллашга чақирди. Бу ҳақда Страсбургда Европарламент томонидан қабул қилинган «Ноқонуний ҳибсга олинган тинч аҳоли ва ҳарбий асирларнинг аҳволи, шунингдек, давом этаётган бомбардимонлар тўғрисида»ги резолюцияда айтилади. Европарламент депутатларининг 507 нафари буни ёқлаб, 77 нафари қарши овоз берди, 45 нафари бетараф қолди.

Европарламент депутатлари, шунингдек, Европа Иттифоқи ва унинг давлатларидан Россия асирлигида бўлганларга инсонпарварлик ва реабилитация ёрдамини, жумладан, тиббий ва психологик ёрдам, реинтеграция хизматлари ва ҳуқуқий ёрдам олиш имкониятини оширишни сўради. Шу билан бирга, Европа парламенти ўғирланган украиналик болалар, ҳарбий асирлар ва ноқонуний ҳибсга олинган фуқароларнинг оилаларини қўллаб-қувватлагани учун Украина ва халқаро фуқаролик жамияти ташкилотларига миннатдорчилик билдирди.

Парламент аъзолари Россиянинг «сон-саноқсиз украиналик тинч аҳолига нисбатан» мажбуран депортацияси, ноқонуний ҳибсга олишлари ва ғайриинсоний муносабатини қоралади. Россия томони ноқонуний ҳибсга олинган украиналикларнинг оилаларини зудлик билан уларнинг қаердалиги ва соғлиғи ҳолати тўғрисида аниқ маълумот билан таъминлаши, шунингдек, Россия ҳукумати томонидан асирда бўлган барча украиналик фуқароларни озод қилиши талаб этилади.

«Украина фуқароларининг мажбуран кўчирилиши, ноқонуний ҳибсга олиниши ва уларга нисбатан қўпол муносабатда бўлиш Россия режимининг ички шафқатсизлиги ва инсон ҳаётини очиқдан очиқ менсимаслигининг намунасидир», дейилади резолюцияда. Европарламент Украинанинг босиб олинган ҳудудларида террорнинг кенг тарқалган ва тизимли қўлланиши тинч аҳолини қўрқитиш, қаршилик, норозилик ва фуқаролик фаоллигини бостириш, украин тили ва миллий ўзига хослигини йўқ қилишга қаратилганини таъкидлайди.